Талдаштардыҥ турулталары кӧрӱлди

Талдаштардыҥ турулталары кӧрӱлди

18.09.2017

Сыгын айдыҥ 13-чи кӱнинде «Единая Россия» политический партияныҥ Алтай Республикадагы тергеелик бӧлӱгинде пресс-конференция ӧткӧн.

Сыгын айдыҥ 10-чы кӱнинде ӧткӧн талдаштардыҥ турулталарына учурлалган бу пресс-конференцияда «Единая Россия» политический партияныҥ тергеелик бӱдӱреечи комитединиҥ башкараачызы, партияныҥ тергеелик бӧлӱгиниҥ качызыныҥ ордынчызы Э. Тюхтенев, Алтай Республиканыҥ Государственный Jууны—Эл Курултайдыҥ Председателиниҥ ордынчызы, республикан парламентте «Единая Россияныҥ» фракциязыныҥ башкараачызы Михаил Терехов, «Единая Россия» партияныҥ Председатели Д. А. Медведевтиҥ Jондык приемныйыныҥ башкараачызы, Эл Курултайдыҥ јонјӱрӱмдик политика аайынча комитединиҥ јааны Наталья Никитенко, Горно-Алтайск каланыҥ мэриниҥ баштапкы ордынчызы Ольга Сафронова, «Единая Россия» партияныҥ Горно-Алтайсктагы бӧлӱгиниҥ башкараачызы Ю. В. Нечаев ле «Единая Россия» партияныҥ бӱдӱреечи комитединиҥ башкараачызыныҥ баштапкы ордынчызы Михаил Максимов турушкан.
Ольга Сафронова: Горно-Алтайск каланыҥ јеринде талдаштар тӧзӧмӧлдӱ ӧткӧн деп айдар керек. Ӧткӧн воскресен кӱнде каланыҥ эл-јоны Горно-Алтайск каланыҥ депутаттарын талдаган. Эмди келер јуук ӧйдӧ тӧзӧмӧл сессия ӧдӧр лӧ анда депутаттардыҥ ортозынаҥ Горно-Алтайск каланыҥ мэри тудулар. Ӱнбериште калабыстыҥ ӱнбереечилериниҥ 31 проценти турушкан. Оны јакшы кӧргӱзӱ деп темдектеер керек. Россияныҥ ӧскӧ тергеелеринде болгон талдаштарла тӱҥдештирзе, бис эҥ артыктардыҥ тоозына киредис.
Талдаштарда беш партия ла јетенге јуук кандидат турушкан. Jеҥӱни эҥ артыктары алган. Талдаштардыҥ кампаниязы ӧдӧр тушта, бис «Единая Россия» политический партияныҥ јӧмӧп турган кандидаттарыла ӧмӧ-јӧмӧ иштеп, олорло кожо каланыҥ эл-јоныла кӧп туштажулар ӧткӱргенис. Ол туштажулар ӧйинде улус каланыҥ депутадына барып јаткан кандидаттарга кӧп тоолу сурактар берген, олорго анайда ок ас эмес баштану-јакылталар болгон. Олордыҥ кезигин кампания ӧйинде ле бӱдӱрип салганыс деп айдарга турум. Арткан бастыра баштанулар ајаруга алынган ла бис олор аайынча иштейдис.
Юрий Нечаев: Кӱӱк айда Горно-Алтайскта озолондыра ӱнбериш ӧткӧн. Оныҥ турулталарыла «Единая Россиядаҥ» бу талдаштарда туружатан кандидаттар талдалган. Каланыҥ депутаттар Совединде 21 депутат.
Сыгын айдыҥ 10-чы кӱнинде ӧткӧн талдаштарда бистиҥ партияныҥ јӧмӧгӧн кандидаттары бойлорыныҥ бир мандатту округтарында јеҥӱ алгандар. Анайда ок партиябыстыҥ алты турчызы списокло ӧткӧн. Бу јакшы кӧргӱзӱ. Депутаттарыс Горно-Алтайсктыҥ ӧзӱмине иштеер деп иженедим ле талдаштарда бисти јӧмӧгӧн ӱнбереечилерге быйанымды айдадым.
Михаил Терехов: «Единая Россия» партияныҥ, оныҥ тергеелик бӧлӱгиниҥ качызы В. Тюлентинниҥ ле республикан парламенттиҥ адынаҥ ӱнбереечилерге быйанымды айдадым. Талдаштарда Горно-Алтайскта јаткан ӱнбереечилердиҥ 31 проценти турушкан. Бу кӧргӱзӱ ӧскӧ калаларга кӧрӧ, бийик болуп јат.
Мынызы эл-јоныстыҥ јаан учурлу талдаштарга каруулу болгонын кӧргӱзет. Анайда ок «Единая Россия» фракцияныҥ турчыларын, республикан парламентте каладаҥ тудулган депутаттарды темдектеп, олорго быйанымды база айдадым. Каланыҥ Совединде јирме бир депутаттыҥ он алтызы «Единая Россия» партиядаҥ болор. Былтыр он беш депутат болгон эди.
Наталья Никитенко: Д. А. Медведевтиҥ Jондык приемныйы бу талдаштарда тууразында артпай база эрчимдӱ иштеген. Эл-јон бистиҥ приемныйга ас эмес баштанган, бис олордыҥ баштану-сурактарын «Единая Россияныҥ» каладагы фракциязына табыштырарыс. Каланыҥ Соведине ӧткӧн депутаттар кажы ла баштану аайынча иштеер.
Михаил Максимов: «Единая Россия» партияныҥ калада ӧткӧн талдаштарыныҥ турултазында бистиҥ кандидаттардыҥ ӱлӱзи јаан. Озолондыра ӧткӧн ӱнбериш чындаптаҥ да калада јадып турган тоомјылу, ижинде једимдӱ кандидаттарды илелеп алар арга берген…
Эмиль Тюхтенев: Ӱндерин «Единая Россия» партия учун берген ӱнбереечилерге јаан быйан айдар керек. Адакы турулталарды ајарып, Горно-Алтайск аайынча сӱрекей јакшы једимдерге јеткенисти темдектеерге турум.
Jе бу ок ӧйдӧ эки јурт јеезеде, Манјӱректе ле Оҥдойдо, партиябыстыҥ јӧмӧгӧн кандидаттары ойнотырып ийген. Айса болзо, јазап иштебегенис.
Кӧксуу-Оозы аймактыҥ депутаттар Соведине ӧткӧн талдаштарда сакыган турулталарга база јединип болбодыс. Оныҥ шылтактарын мынаҥ ары јазап шиҥдеп кӧрӧр керек. Оныла колбой тергеелик политсоветтиҥ јууны ӧдӧр.

К. Яшев, altaicholmon.ru


Новость размещена: *



 

Комментарии

Нет ни одного комментария, вы можете добавить первый.