Эрте jас, ак туман

Эрте jас, ак туман.
Эбире туулар jогылат.
Тӧҥ алдында кара суу
«Мен мында» — деп шулурат.

«Мен мында» — деп туманнаҥ
Кем эркелӱ унчугат?
Ӧткӧн ыраак jылдардаҥ
Кандый сӧстӧр угулат?

Бистиҥ jарат туманда,
Бистиҥ салым туманда.
Сӱӱген jерис та кайда?
Сӱӱнчибис та кайда?

Jылу jымжак туманда
Jылдарым ыраакта jылыйат.
Сениҥ айткан сӧзиҥди
Туман ойто шымырайт.

Эртен тура, ак туман
Кӧзнӧгиме jапшынат.
Сениҥ кару кебериҥ
Jылдар учында jылыйат.

1989 j.





 

Комментарии

Нет ни одного комментария, вы можете добавить первый.

Каталог туристических сайтов TourStars